梁振英原來對創新及科技局之設立有咁大情意結，立法會拉布拖死創科局咩，佢就一於奉行毛語錄嗰句──敵人反對的，我就擁護，索性利用特首權力，委任原定會出任局長嘅前理大副校長楊偉雄出任三個職位：（一）特首科技顧問：（二）行政會議成員；（三）創新科技諮詢委員會主席，替代了財政司司長曾俊華。楊偉雄在理工大學只係管行政工作嘅副校長，無博士學位，一下子成為香港科技政策最高揸弗人，用美國流行術語講，就係香港嘅Technology Czar（科技沙皇），認真巴閉，就像內地傳媒形容郭伯雄望子郭正鋼──坐火箭往上飛，希望楊先生坐火箭坐得穩穩陣陣，唔好似郭正鋼咁快速跌下地球。
一位特首顧問兼諮詢委員會主席，以後如何推動政府部門工作？因無前例，難以預測，相信公務員亦唔知點樣應付楊顧問嘅「柯打」！究竟係蘇局長大還是楊顧問大？楊顧問是否手持尚方寶劍，奉特首旨意行事，最好講清楚，否則泛民立法會議員一定搵方法為難佢。原來嘅創新科技督導委員會中，有四位委員係電腦電機專家學者，就係科大校長陳繁昌，港大常務副校長錢大康，中大常務副校長華雲生，中大前副校長程伯中，呢四位教授嘅學歷與國際學術地位都高過楊偉雄多多聱，希望楊先生聽吓佢地意見啦。
呢日有電訊公司宣佈業績後，請分析師吃午飯解釋成績表，問CEO W先生點睇香港科技發展，W先生答得妙：「去深圳啦。」喂，講香港噃，點解去深圳？W先生話深圳有華為、騰訊兩大軟件硬件科技巨人在，僱員數以萬計，單係華為，已請咗數以千計嘅博士，數以萬計嘅碩士，學士更不勝其數，人數多，人工比香港便宜，香港如何與之競爭？W先生話：「寫電腦程式已是勞工密集行業，不再是hi-tech，香港攻讀科技理科嘅大學生人數不多，人工又貴，我諗唔到點樣同深圳爭。香港頂多只能與深圳合作啫。」
想落又係，譬如當今流行嘅高空拍攝無人小飛機，係科大畢業生搞出嚟嘅，據講已在深圳設廠請咗近二千人，香港公司總部在科學院，請咗大約十個八個，冇深圳嘅話，根本生產唔到遙控小飛機。發展香港科技喎，唔係靠公務員推動嘅，如果由左丁山話事，就會向港大科大中大理大城大嘅工學院（電子、電機、自助機械、電腦等學系）多撥二十億元增聘教授，擴充學額，所有上述學科學生有四年免學費，吸引尖子入讀（現時工學院收生成績分數普通遠遠不如醫法商），或者十年後，可有樹蔭乘涼。