新界廿七個鄉事委員會近日輪流改選，元朗八鄉鄉委會同新田鄉委會主席，已換上新面孔，有人話元朗八鄉換咗話事人，江湖從此可能更多事，事關人稱四眼民嘅橫台山瀝背村村代表鄧瑞民，撼贏曾憲強，上位做主席。
鄉委會副主席爭崩頭
四眼民近年個勢勁，特首梁振英兩年前去天水圍搞論壇聽民意，據聞四眼民有份負責號召天水圍北五條屋邨人馬到場挺梁，更上陣在旁指揮。據聞佢上屆已經想做主席，可惜好夢成空；今次以鄉委會主席身份「殺」入埋鄉議局後，唔知有冇乜拼搏大計？
至於新田鄉委會新任主席嘅style，則由退休校長文炳南接替文志雙做話事人。噚日廈村鄉事會選舉，鄧勵東連任；至於周四改選嘅錦田鄉委會，則由鄧賀年冧莊主席。稍後改選嘅三個元朗鄉委會，據聞現任主席都會連任。
鄉事「錢」途無限，連鄉委會副主席都爭崩頭，八方聽聞稍後改選嘅大埔鄉委會，首副主席除咗原為主席嘅經民聯嘅文春輝有意競爭，大埔區議員陳笑權都蠢蠢欲動。八方問過陳笑權係咪想撼文春輝，佢話「未決定、唔講住，多謝關心」。