阿士東維拉易帥後終開齋，不過嗰份保命嘅頂級鬥志，會唔會喺四日後嘅今晚、同地上演嘅足總盃八強，演繹多一次，連勝西布朗？筆者有懷疑。
長期似受霧霾困擾嘅維拉，換上激情嘅舒活掌帥算快速見效。多得西布朗嘅門將賓科士打補時犯錯，維拉由把刀生晒鏽嘅賓迪基操刀極刑奠勝，周中呢球唔只係今季最後一支攞到十二碼嘅英超隊；維拉仲係四級聯賽中，今年最後一支聯賽贏波球隊。全場十六次射門八中框，係該會今季攻得最猛最準嘅一場波，攞呢三分，極盡艱辛。
維拉護級至上有疑點
如果維拉今場乘勝續踢聯賽，筆者未必會調轉槍頭；但佢哋護級至上，舒活聲稱今晚足總盃唔會排弱陣，但門將會否改用盃賽擔正嘅老將基雲？正選左右閘，侯頓停賽、阿里施蘇高續傷；用馬菲路頓同巴根拿頂檔，危機所在。上仗表現最佳球員，維拉快馬艾邦拉荷，夠唔夠時間回氣，再以一人之力爆破對手防線，又係另一疑點。箭頭賓迪基對上一球入嘅「生波」，已係兩個月前喺第三圈淘汰黑池，狀態未證已復蘇。
西布朗有「不降領隊」美譽嘅普利斯，自元旦日接手後，錄得六勝四和二負，並在聯賽逐漸脫險。睇番西布朗對上五仗，作客輸畀維拉外，其餘錄得三勝一和；當中嘅聯賽戰況，貫徹領隊穩健作風，攻門不多中框又少，依然贏多輸少，可見隊波雙箭頭伊迪耶（白衫）及比拉希奴，射門把握力厲害。尤其想點出，呢五場波包括上一圈足總盃四球大炒韋斯咸，雖然槌仔幫喺下半場中段落後三球下再踢少個；但西布朗全場開懷進攻，錄得十七射八中框，比起另外四場嘅總中框次數僅少一次，可見對待足總盃，普利斯開放得多，平手盤高水，客軍博得過。
今周另一冷門，博英超獨腳戲嘅主隊昆士柏流浪。昆軍從杜拜充電返嚟，剛戰僅敗作客阿仙奴；但上半場攻門精華鏡頭，大部份在主隊，氣勢不算差。相反熱刺今晚剛好是一個月內應付嘅第八場波，近績向下，倫敦打吡作客讓半/一，太多了。至於強勢利記明迎布力般爭入英足盃四強，兩隊攻得起，可博紅軍「大」勝波膽。
波神
神級攻略 智破足彩