呢排TVB新聞部認真多新聞，之前有大班資深記者拉隊走人、又請民建聯前總幹事，噚日仲有傳媒話，TVB新聞部為「慳皮」，將實習職位減到得八個，而且一半係大陸學生。外界自然將呢單嘢算到新聞總監袁志偉頭上，而且覺得一定同赤化有關。當然呢啲路邊社冇根冇據猜測，就梗係唔好輕易信。
正如高登仔話齋，冇圖冇真相，八方日前幫襯新蒲崗某食店，竟然見到店主貼咗張同名人嘅合照，其中一個係花哥，至於另一個，就係近排成日見報嘅亞洲電視執行董事葉家寶！兩個電視台高層，為乜會一齊食嘢？係咁啱撞到？定約埋傾密偈？係交流「慳皮」心得？抑或研究如何發揚新聞愛國愛港功能？真係令人無限想像。