宇宙最強餐館Noma月前在東京東方文華搞「崛起」，猛龍過江限時酬賓，一飯難求不在話下，對於有辦法的香港貴婦來講這當然不成問題，氣定神閒組團捧場。成員之一事後表示失望，評語是丹麥大師採用日本材料欠缺層次，道道菜入口大同小異，而且偏酸。想不到冇份品嚐的為食朋友聽聞大受刺激，吃不到的葡萄發酵起來酸上加酸，黑起塊面嬲爆爆頂嘴：「我冇人哋咁高級，食嘢識食層次，我淨係識食味道㗎咋！」眼見勢色不對，為了安撫受傷的弱小心靈，唯有用息事寧人聲氣答：「閣下識食味道都好叻啫，我淨識食飽肚！」此話半真半假，農民式的基本口腹要求雖然理直氣壯，但永遠不會去到張愛玲《怨女》裏外婆的境界——外孫女替她盛飯，「用飯勺子拍打着，堆成一個小丘，圓溜溜地突出碗外，一碗足抵兩碗」，她還嫌不夠，一疊連聲督促「撳得重點，姑娘，撳得重點」，簡直像《格雷的五十道色戒》的對白。而且食量小，胃的空間很容易填滿，以己度人往往闖禍，連高雅的楊凡導演都不惜撕破面皮，到處唱我請人食飯永遠食不飽。
挑選食肆其中一個考慮是地點方不方便，像以前西班牙山旮旯那間El Bulli，舟車勞頓暈十次車浪都未去到，點好食都千祈咪預我。另外就是服務，譬如《速遞》甜榜排第四的Arnaud Larher，聖日爾曼店便利過七十一，但那兩個晚娘嘴臉的店員，亞裔的已經夠惡頂，操濃郁東歐口音法語的仲衰，蛾眉倒豎殺氣騰騰，似足武俠片黑店的店小二，一次咁兩次都係咁，那就不會有第三次了。