蔣雅文成為台灣媳婦，提起老公朱經雄她都不自覺笑笑口，港女遇台男是喜樂多於拗撬。老公是可以「治」到Mandy的人。記得有次Mandy買了一碗油飯回家吃，卻被貓咪打翻。最後兩人冒雨騎着電單車，四出尋找油飯，Mandy說：「一路落住雨一路搵都搵唔到，後來我喊起上嚟，嗰一刻覺得好內疚，我話『對唔住呀，我唔應該咁任性，唔應該帶你出嚟淋雨，我哋返屋企啦』，佢喺前面大笑囉。」故事仍未完結，回家後Mandy喊着跟老公說：「我覺得你真係對我好好，好對唔住我害咗你。」老公的回應卻是：「我老婆真是好奇怪。」Mandy覺得老公對自己死心塌地的原因：「可能佢覺得我同港女唔同嘅地方，係我會講『對唔住』啩。」
今個月Mandy的父母會到台灣，體驗當地生活並看是否可以在當地定居，她說：「之前爹哋媽咪嚟探過我住過喺花蓮，印象好好。不過要長住始終有出入，如果佢哋好鍾意，我會好開心接受。」
採訪：顏英儀
攝影：陳慧安