因為財爺曾俊華嘅一碌神棍，令到政圈掀起一股自拍風潮，繼自由黨榮譽主席田北俊喺民主黨黨慶同記者selfie、全國政協常委唐英年北上開會不忘自拍大頭相，噚日輪到經民聯立法會議員梁美芬趕上呢個熱潮。
佢噚日朝早出席港台節目《千禧年代》，同民建聯副主席張國鈞講政改。之但係佢嘅發言內容，都不及紅色拜年look搶鏡，咁啱噚日又係元宵佳節，呢套紅裝都幾應節，佢仲喺節目後同節目監製區麗雅用手機自拍，爭妍鬥麗一番。但鼠王芬噚日查實係孤伶伶過節，事關佢老公王貴國係政協委員，身在北京開兩會，形單隻影嘅鼠王芬，噚晚搭飛機到北京會夫君。