「超人」李嘉誠投資新科技出名眼光準，私人公司維港投資嘅成功項目多不勝數，超人猛將長實（001）「樓神」趙國雄唔知係咪亦有所啟發，噚日話自己近年開始涉足風險投資（VC），私人總共投資咗十三間startup公司，大部份係中港兩地，最近仲走出海外，學超人喺以色列投資㖭！
趙國雄話，平均每間會投資五十萬至一百萬美金不等，折合即係每間最少揼四百萬港元啦。用中位數七十五萬美金計，即係總投資額高達九百七十五萬美金，即七千六百萬港元。按長實二○一三年嘅年報，趙國雄年薪二千九百萬元，絕對投資得起。
講到最鍾意嘅項目，佢就話係近年好流行嘅航拍攝像直升機，仲試過帶去大埔樓盤嵐山試玩，效果唔錯。除咗高科技投資，佢亦有買回報穩定嘅債券，拉勻整體去年投資回報約9%。