春天萬物重生，但同時連細菌都活躍埋一份，所以身邊好多朋友都病咗。同事因為塊面啲肌肉有不規律嘅輕微抽搐，去咗睇中醫，「醫師話係精神緊張影響筋肉。佢開咗藥畀我，話有蠍子㗎。佢話用昆蟲入藥藥性猛啲，仲話如果都搞唔掂，就仲要加埋蜈蚣㖭」。同事話加咗蠍子苦好多。
聽到都驚，費清請教吓醫師關之義，佢話昆蟲入藥藥性強，但唔可以一概而論，因只要用得適宜，草藥都可以強過昆蟲。
不過，佢話蠍子藥性強，但同時有毒，「最毒係條尾，但有藥效嘅，正正就係條尾」。佢話同蜈蚣一樣都可治療肌肉痙攣、神經失調。不過，關醫師提醒，蜈蚣毒性比較高，「大家成日聽到神農氏嚐百草，知唔知佢最後試食咩死㗎？就係蜈蚣喇」。不過，費清google就發現，都有人話神農氏係食斷腸草死嘅，其實傳說好難搵到根據，重點係呢類藥都要小心服用，一定要有醫師指導。試藥留番畀神農氏啦。
費清 ＃要生計，也要生活 ＃毋忘初衷