人大開幕，國務院總理李克強公佈咗新一份工作報告，百分之七嘅經濟增長目標，基本上都只係循例公佈一下，市場一早預期咗，毫無驚喜。今年具體工作重點，微小企業、基建、金融以至三農，基本上都有提及，大方向轉變就唔見有。
兩會之前熱炒嘅基建sector，今次工作報告又點會唔提？總理除咗重提今年鐵路投資八千億元外，上個星期筆者有提到嘅水利方面，今次李克強就有明確講明會投資八千億元，呢個八千億元係乜概念？根據發改委水利部數據，第十一個五年計劃嗰五年內大陸喺水利上嘅投資係七千億元；而喺舊年嘅工作報告，李克強就提出用中央預算內嘅七百多億元投資喺水利，今年頭水利廳會議就提到，舊年水利方面嘅投資總共係四千八百八十一億元……我再重申一次，今年工作報告水利投資嘅數字係八千億元！
除咗投資目標外，工作報告亦有講工作目標，包括要解決六千萬農村人口飲水安全問題，力爭讓最後二十多萬無電人口都能用上電。喺舊年嘅工作報告，提出嘅目標係經過今明兩年（即係舊年同今年）要讓所有農村居民都飲得到乾淨水。
流氓