金管局新辣招是否可以壓抑樓價，大概唔係有好多人睇好。真實歷史經驗就係，自從2012年秋季梁振英上台第一炮，推出辣招之後，樓價係咁上升，細價樓更加升到癲，曾俊華、陳家強、陳德霖三人口徑一致講美國會加息，樓價超乎市民負擔能力，樓宇供應長期會追上需求，辣招會壓抑需求等供應追上來等等口術，全無阻嚇作用，市民買細價樓（如沙田第一城）已陷入恐慌性購買狀態。既然真實歷史如此，我地憑乜理由相信新辣招會壓抑樓價，甚至令樓價下滑？
過去兩年半，信辣招可產生作用，因而唔買樓，甚至賣咗樓嘅人士，大有人在，現在懊惱後悔非常，幾值得同情。調低樓宇按揭上限至六成（七百萬元樓宇以下），即是要買家交出更多首期，銀行樓宇按揭貸款更安全穩陣。第一次置業人士希望儲錢能力與速度能夠追上樓價上升速度，或者係一個奢望，咁就要去追一手樓嘞，發展商財雄勢大，有能力提供按揭優惠，可與財務公司合作提供二按，解決新買家嘅首期問題，故此新辣招係明益一手樓發展商嘅，二手樓經紀就苦過DeDe咯，成交量會急速冰封。
新辣招明顯會阻止市民買二手樓，嚇阻市民搶高樓價，但金管局就一味話要維護銀行系統穩健性，令到啲賓架掩住嘴笑，但又唔敢笑出聲，以免得罪金管局。香港銀行嘅按揭貸款早已係全世界最穩陣嘅啦，香港市民供樓準期，絕不拖欠，壞賬率奇低，而且不少人一有錢就去提前償還全部或部份，令到貸款餘額降低，搞到銀行賺少好多利息。一位賓架對左丁山講，佢間銀行嘅樓宇按揭平均結餘係三百萬元上下，與樓價相比，細得緊要，佢覺得係穩陣過頭，好希望供樓人士加按㖭，有此情況，金管局仲驚香港銀行系統唔穩健？開玩笑咩。新辣招嘅社會效果就係加劇貧富懸殊，令財富差距（wealth gap）更加擴大。無他者，我早已買樓，眼看樓價日升，笑嘻嘻，你未買樓，只係租樓，睇見樓價日升，就氣頂，而兩者嘅身家亦日益相距甚遠。叫特區政府縮短貧富差距，憑乜呀，在全球量化寬鬆情況下，根本無能為力。有資產者，身家日厚，無資產（或只持有現金）者，身家停滯不前，新辣招阻人購買固定資產，就有擴濶財富差距作用，直至樓價大跌為止。