楊冪去年幫老公劉愷威生咗佢哋嘅愛情結晶囡囡「小糯米」，BB女目前已經9個月大，楊冪喺周一(2號)爆囡囡目前已經學講嘢，第一句仲先嗌「爸爸」，不過兩公婆就一直唔准囡囡個樣曝光，就算合照都要刻意就角度或遮樣。
昨日有雜誌爆新抱楊冪有指今年農曆新年期間，老爺劉丹一心想帶乖孫女去見下親戚，點知新抱楊冪年初三返港病咗，唔止禁劉丹嘅親友上門拜年，又因為香港近排流感肆虐，唔畀劉愷威同囡囡小糯米外出，劉丹唔想個仔難做，惟有兩老自己去拜年。
該報道又指楊冪同劉愷威今年農曆新年特登攞咗10日假陪囡囡，兩公婆仲同囡囡去咗北京探楊冪嘅外公、外婆吃團年飯，不過當時北京天氣凍、空氣差，囡囡小糯米得8個月，楊媽媽怕小朋友唔習慣北京天氣，先叫佢哋留三日就返香港，可能係咁先患上感冒。
該報道有向劉愷威求證，男方就話係為咗老婆同囡囡健康，新年喺香港嗰幾日冇咩出去，劉愷威都係喺屋企同囡囡玩，楊冪都有自我隔離，唔靠囡囡太近，就算想抱吓個女，楊冪都會戴口罩，話早前楊冪已經返咗內地開工，囡囡要等出年先可以去拜年。
劉愷威又話囡囡小糯米鍾意黐佢多啲，報道更引述劉愷威講囡囡好奇心強，如果冇人理，佢仲會叫，好似管家婆咁，仲講過想過幾年再生多一個，同楊冪都有共識，目前要努力賺「奶粉錢」，等囡囡再大啲，就可以多啲陪住囡囡。