二○一三年馬化騰首次成為全國人大代表，同小米掌門人雷軍一起，成為僅有的兩位互聯網界代表。政壇得意，令兩人業務如虎添翼，小米手機前年開始紅爆，騰訊（700）股價就當年翻一番，榮登股王。點知去年馬化騰以腰痛理由缺席人大，跟住全年極少公眾場合出現，幾乎絕迹政壇，騰訊股價全年亦跌7%。今年馬化騰強勢復出人大，一口氣提出四個議案，數目比二○一三年所提議案數目三個，仲要多出一個。以往績計，莫非騰訊股價今年可以睇高一線？
要留意，馬化騰喺內地政壇，絕非甘於寂寞之輩。佢喺二○一一年擔任深圳市人大代表之時，領銜二十三名代表聯名高調提交議案，指應約束互聯網業的不正當競爭行為，直接針對競爭對手360公司。當時內地輿論譁然，認為馬化騰有利用人大身份為私企謀利之嫌。
點解馬化騰去年轉為低調？可能係因為去年馬雲先係當紅炸子雞，多次獲領導接見，中央要力保阿里巴巴美國上市成功，馬化騰亦識做收聲，費事搶風頭。而家阿里巴巴上市成功，工商總局再冇顧忌，可以同馬雲開片，阿里巴巴股價屢創新低。政壇風水輪流轉，呢鋪輪到馬化騰發圍，亦預示今年騰訊業務可能會大展拳腳。
李可強