唔少政商界人士睇淡前海深港現代服務業合作區，但曾經被會員通過罷免、其後下台嘅前律師會會長林新強，卻對前海信心十足。花生友聽聞，林新強有份嘅華商林李黎聯營所獲批喺前海成立後，農曆年後悄悄開業，仲準備本月中或下旬搞開幕禮，賀一賀得以成為首間落地前海嘅聯營律師事務所。
有老友同花生友講，雖然林新強舊年黑過墨斗，但今年應該順境番，尤其佢嘅律師事務所成為殺入前海嘅先頭部隊，相信都有唔少斬穫。原來舊年十一月初經廣東省司法廳審核後，華商林李黎（前海）聯營律師事務所已經正式成立，林新強向花生友證實，截至農曆新年後先至試營，呢段期間無乜大問題出現。至於係咪本月後期搞開幕禮？佢話希望啦，但未揀定日子，更遑論有乜剪綵嘉賓。
雖則唔少人睇好林新強喺前海打頭陣有金執，但佢同花生友明言：「你可以話『執輸行頭慘過敗家』，但亦有人覺得『行先死先』㗎。」林新強笑笑口話，𠵱家都唔知呢次殺入前海嘅結果係點㗎，但一向愛國嘅佢強調都有信心，相信可以將香港好嘅一面引入內地。
咁林新強外，仲有幾多香港法律界對前海蠢蠢欲動？花生友向前海港務首席聯絡官洪為民打探，佢話廣東省司法廳批准可以有最多十間粵港澳聯營律師事務所喺前海立足，暫時除林新強嗰間，另有兩個申請亦批咗。
花生友