《明報周刊》大地震？噚日有報道指任職《明報周刊》總編輯成廿年、現年六十一歲嘅龍景昌已經辭職，消息仲話《明周》唔少編採部高層，都會跟住佢走人，而龍景昌絕對唔係因為「壓力」而離開《明周》，相信係另謀高就。
咁又係。帶住成隊兵出走喎，唔通真係退休？《am730》向龍景昌求證，引述龍景昌證實已經辭職嘅消息，至於係咪另起爐灶搞新刊物呢？報道話，龍景昌冇回應，只係話「並非為退休而離開」。
立場新聞則引述消息話，指資深電影人岑建勳稍後會創辦一份「高質素」周報，龍景昌會加盟。
查實早喺兩、三年之前，政圈已經流傳曾任《號外》總編輯嘅岑建勳會搞雜誌，但一直只聞樓梯響，似乎今年真係有機會成事喎。