呢個世界有種「果」，你食時會帶點酸，食完之後更加奇酸無比，味道非常差，但偏偏每日都可能會食幾次，呢種果，就係「如果」。
好多球員成日都食「如果」：「如果我冇甩手，球隊就唔會輸！」、「如果我當時射入嗰球，就贏咗世盃啦！」、「如果我後生時唔係成日去玩，練好啲波，就唔使踢細會，一早轉咗去大會啦！」、「如果我唔係咁衝動，就唔會拎紅牌啦！」至於教練亦都有食：「如果我當時簽咗佢就好啦，點知佢𠵱家咁好波？」、「如果我有多啲錢簽到邊個同邊個，就一定贏到冠軍啦！」、「如果我後生啲，落場一定踢得好過你哋！」以上說話，我真係聽過唔少，但我成日諗，如果變成事實又會係點呢？
就好似阿仙奴，如果當年真係簽到美斯同基斯坦奴朗拿度，佢兩個又會唔會真係好似𠵱家咁好波呢？定係只係會變咗另一個禾確特，或者係第二個拿斯尼呢？如果……其實又邊有咁多如果呢？冇發生嘅事，即係冇人知結果。不過，「如果」都有佢嘅作用，就係提醒我「過去讓它過去」。冇發生到嘅事，即係可能未必發生，只要記得犯過嘅錯，唔好再錯失任何機會，以後準備得更好就可以啦！機會唔係經常有，有啲機會更係可一不可再。
「銀河唯一」弗到漏
就好似基奧特（圖），以前成日俾人話入唔到波，又多桃色新聞，俾人話似模特兒多過似足球員。今季佢終於變身成為「銀河唯一基奧特」，聯賽十七場已經入咗十球。如果基奧特只係掛住「如果前、如果後」，又點會識向前行呢？
星期一晚英足盃阿仙奴要對曼聯，我相信阿仙奴球員唔會食「如果」，會毫無保留咁踢一場好波擊敗曼聯，最終可以衞冕成功。
LULU
不懂踢波愛睇波