係人都知李克勤係曼聯死忠，仲有「送禮勤」之稱，其實喺英超都有唔少球員爭住「送禮」，幫曼聯贏波。上星期六對新特蘭，有奧沙同布朗兩位紅魔舊將爭住「獻瑞」，送個十二碼畀曼聯；星期三呢場對紐卡素，就靠雲高爾愛徒、紐記荷蘭門將告魯爾送大禮，艾舒利楊格先可以喺完場前入波，幫紅魔作客險勝1:0。
末段「助攻」楊格輸波
除咗告魯爾，曼聯先要多謝英超球證又走漏眼，喺十分鐘，中堅基斯史摩寧喺禁區內踢跌利維亞尼，但球證同旁證都話冇事，曼聯逃過一劫。曼聯之後喺上半場都幾多攻勢，但告魯爾救咗唔少靚波，幫紐記半場保住清白之身。呢位有份幫荷蘭喺舊年世盃上陣嘅門將，喺賽前都講過，唔會忘記喺國家隊同雲高爾共事嘅日子，但會喺呢場比賽放低昔日恩情，幫紐卡素搶到三分。
告魯爾冇講錯，真係全靠佢先搶到三分，但佢幫嘅係曼聯。踢到去八十九分鐘，曼聯仲係咬唔入紐卡素，後備上陣嘅贊奴沙同桑馬達都唔係幾交到貨，正當雲高爾好惆悵嗰陣，告魯爾就「報恩」！當時朗尼右路突破，但陷入重圍，俾紐記球員搶番個波。朗尼好勤力去逼，逼到紐記要回傳畀門將告魯爾，而喺情急之下，告魯爾一腳踢咗畀禁區入面嘅艾舒利楊格，最近喺羊年越踢越好嘅楊格一腳射入，幫曼聯奠定勝局贏1:0，保住聯賽第四位。雲高爾喺場邊見到楊格入波後，都開心到彈起身，仲拍打助教傑斯塊面，但傑斯就笑都冇笑，究竟佢係黑面，定係冷靜呢？
雖然擺明贏得有運，但雲帥賽後好興奮咁話：「喺成場波，我哋都係佔優嘅一方，呢場可能係我哋今季踢得最好嘅比賽，最難得嘅係，呢場係作客㖭！我哋贏波絕對係實至名歸。」另外，曼聯中堅莊尼伊雲斯同紐記前鋒柏比斯施斯互吐口水，但球證睇唔到，唔排除英足總會對兩人秋後算賬，仲有報道話兩人可能被罰停賽六場㖭。
識睇，一定係睇足英台【英波Live】：
http://soccer.appledaily.com
http://bit.ly/engballlive