新年期間去咗尼泊爾旅行嘅公民黨副主席陳淑莊（Tanya），已經準備打道回府，點知準備返港時撞正土耳其航空飛機有意外，令加德滿都機場關閉，Tanya就此被迫滯留喺尼泊爾。
但呢個意外都無損Tanya雅興，仲錯有錯着，俾佢遇到啲好好玩嘅嘢，喺元宵節可以享受一個人嘅快樂。
Tanya噚日貼咗張自拍花面貓嘅相上facebook（圖），佢話聞說加德滿都機場冇大型起重機移走出事飛機，所以機場要關閉三日，但陰差陽錯下卻遇上尼泊爾嘅大節日Holi Festival（侯麗節、又名五彩節），佢話呢個節日有啲似泰國潑水節，為咗投入節日氣氛都整到自己成隻花面貓。