禮拜日沙田七草三泥賽事，草地用最狹窄之C加3欄作賽，睇番最近2月7日同一移欄賽事，場場都有一至三檔馬上名，反而十檔或以外馬只得兩席位置。至於跑法方面，雖然跑道狹窄，不過唔代表無得追，當日頭馬全部都係居中後上勝出，所以排內檔又擅爆一段嘅馬最值得捧場。今戰列陣馬中，第四場「吉利高」及第九場「比卡超」都係跑田C加3欄1400米兩次全勝，場地性能出色，雙雙抽到中內檔值得睇好。
至於泥地方面，短途一向利擺前，中距離就利後上，所以第一、三場嘅泥地一哩賽要優先留意「藍色海灣」及「奪目商人」等後追馬，至於第七場泥地1200要睇實「霸氣」及「頌友」等前置馬。