方嘉柏第二場靠潘頓贏「醉中意」追平大摩唔夠喉，第六場四班一哩，佢搵徒弟出馬，結果何澤堯幫師傅勝出「光速銀桂」起孖，截至此場小方累積36win，反先大摩一win，重奪練馬師榜一哥位置。
何澤堯係呢晚繼師兄楊明綸贏「威龍」後，另一位贏馬的華將，「光速銀桂」上次出擊失手跑第三，今勻何澤堯再騎5.4倍親手補中，該駒上季至今已三捷，可惜馬主前體操王子李寧冇喺凱旋門出現。
今場同堯仔串Q係另一師兄黎海榮座騎「金叻星」，後駒冷到30倍，全晚首條華將Q派658元，第三名潘頓之「千杯豪情」，潘頓連續四期三T次關都上名，第四名由鄭雨滇騎「過關勇將」拎到，華將差少少串唔到三重彩，栽喺潘頓手上！
賽後方嘉柏表現興奮狂笑，佢話呢晚有雨，「光速銀桂」喜歡跑變化地，加上磅輕檔好及何澤堯留放一絕，也是贏馬關鍵。