日前有人聲稱擁有羅馬王子托迪老婆布拉西嘅自拍裸照，並且喺網上兜售，每張索價二百至三百歐元（約千七至二千六百港元）。布拉西雖然已經三十三歲，但話晒係模特兒兼電視台姐仔，加上個樣又唔差，所以應該有唔少男粉絲有興趣，但網上所見嘅自拍裸照，個女人冇布拉西一個獨有紋身，睇怕係流嘅機會多。
撇開係堅定流唔講，布拉西露點唔係乜嘢新鮮事，事關佢前年夏天同托迪去享受陽光與海灘時，唔覺意喺水中露點，仲要上埋意大利八卦雜誌嘅封面。另外，話晒佢喺意大利演藝界有啲知名度，老公托迪又係意甲其中一位殿堂級球星，𠵱家呢位仁兄將佢嘅自拍裸照開價二百至三百歐元，我求大俠就覺得似乎有啲低囉！