日本組合多如天上星星，當市場消化唔到咁多，淘汰係必然現象。前晚Morning娘師妹組合Berryz工房，喺武道館舉行最後一場演唱會，之後就會解散。Berryz工房成立於二○○四年，當年Morning娘大紅之後，女性偶像沉寂咗一輪，師妹Berryz工房成績只屬普通。直到AKB48五年前開始爆紅，令偶像熱潮再吹，但好多唔鍾意AKB嘅宅男就捧桃色四葉草抗衡AKB，兩組合完全霸佔女性偶像市場，其他偶像粥水都冇！
據指Berryz工房成員年紀漸長，都冇新血加入，連成日扮細路女懶cute嘅成員嗣永桃子都已經二十二歲，爭食難上加難，因而被迫解散。至於另一組人多多嘅偶像組合Idoling早排已盛傳佢哋會解散，到前日佢哋嘅監製喺Idoling官方網頁中承認係事實。連AKB人氣都開始下滑，似乎偶像熱潮開始減退，可能會有更多偶像組合摺埋。
撰文：李村姑