政圈早前盛傳原為梁粉嘅行會成員羅范椒芬，同特首梁振英貌合神離。到底係咪呢？八方唔知，但羅范噚日喺免費報章《am730》專欄撰文批評梁班子，又令人覺得呢啲傳言可圈可點。羅范喺文中比較新加坡同香港嘅執政團隊，讚新加坡團隊理念一致、歷練豐富，至於香港，佢話既冇執政黨為政府保駕護航，亦乏高質素智庫，而梁振英當選後要喺短時間內籌組班子，「拉雜成軍自然難以組織『一條心』的團隊，更有甚者陽奉陰違或因循怠惰」。到底邊個班子成員陽奉陰違同因循怠惰？邊個係雜牌軍？噚日成為政界熱話，而向來同CY不咬弦嘅財爺曾俊華，以及被指冇乜為創科局拉票嘅商經局局長蘇錦樑，據聞都係羅范暗批熱門對象，唔知羅范會唔會喺稍後時間解開謎底呢？