繼二○一二年出現「港女500」事件後，最近網上流傳，有準新娘向獲邀賓客發出「去飲注意事項」，更要求「人情」要高過公價。查實結婚畀「人情」都係講心意。講乜公唔公價呀，同你感情好啲嘅，畀多啲又有咩所謂。
首先，陳奕迅演唱會飛，六百蚊都買到張中間價嘅飛，人哋有唱歌、跳舞、設計，仲要有質素，請問呢對新人又會表演乜呢？咁我當食飯嘅話，傳聞呢位準新娘只係喺普通酒樓擺，普通一餐飯最多值二百五十蚊，咁我何解要畀六百蚊出來？所以面就人哋畀，架就自己丟，前車可鑑，點解仲會有人做呢類儍事？有人會問，而家啲港女點解會現實咗咁多？查實好可能一直都有呢類事實發生，只係以前資訊冇咁流通，你唔知啫。
「人情」個利是封係只一外殼，最重要隻殼有幾多料子。老牌紡織股福田實業（420），二○一二年由央企中紡集團入主後，業績你話靚就唔靚，去年上半年少賺53%，不過最少唔會好似二○一二年咁，全年蝕3.4億銀先。
咁要公司有起色，注資係少不免的事。更重要係，阿爺大力推動央企改革，自收購後，至今已超過規定的兩年時間，所以你話福田有注資憧憬唔係冇道理。隻股咁耐冇炒過，近呢兩交易日突大陽燭抽升，累積升超過一成，可能係有好事發生嘅先兆。
Fifi
http://www.facebook.com/lovefrystock
本欄逢周二、四刊出