上市公司商會每年舉行新春酒會都好熱鬧，今年羊年都唔例外。二○○二年促成商會成立嘅鷹君（041）主席羅嘉瑞（Dr.Lo）幾乎年年都到。雖然佢舊年冇再做商會主席，只做副主席，但噚晚亦滿場飛。睇真啲，Dr.Lo套三件頭西裝低調得嚟幾特別，裏頭係一件類似中山裝嘅內褸，啱晒着嚟拜年。佢細佬羅康瑞出名鍾意着中山裝，唔通Dr.Lo受佢感染？
至於去親酒會都悉心打扮嘅金利豐（1031）老闆娘朱李月華上咗京開會，派阿仔朱俊浩單拖到場。噚日落毛毛雨又翻風，朱俊浩就整個許文強look，見佢談笑風生，睇嚟好快獨當一面接棒。