冇糧出嘅亞視員工真係要多謝人稱「舖王」嘅鄧成波！事關波叔最錫嘅孻仔鄧耀昇（Stan）噚日同傳媒飯局時自爆，波叔就係上月以八百萬元買入亞視荃灣川龍嗰幅十三萬呎農地嘅白武士，讓亞視有錢出糧員工。
Stan已被外間視為波叔接班人，佢話：「𠵱家地皮仲係生滿雜草，稍後會搵人去打理，將地皮改為水耕種植場或者劃開多幅細田地，畀員工耕種。」他口中嘅員工就係來自佢負責嘅東海．海都飲食集團。
咪睇Stan年紀輕輕，八十後嘅佢好識人情世故，明白要人幫佢打工，先要打動員工個心。Stan話，呢個飲食集團有成六百名夥計，其中四百四十個都結咗婚，仲有仔女，平均每個家庭都有超過一名心肝寶貝，所以希望畀一個好地方啲夥計，喺假日可以一家大細喺嗰幅農地度享受天倫樂。