周大福（1929）第三代接班人鄭志剛（Adrian）向來鍾意搞藝術，將珠寶同藝術夾埋一齊搞，肯定啱佢口味。本月十九至廿六日、珠寶鐘表業界一年一度盛事「瑞士巴塞爾鐘表珠寶展」，今年首次有香港珠寶商「古珀行」成功進入主場一號館作展覽。
古珀行隆重其事，趁噚日香港國際珠寶展開波，宣佈搵來音樂人雷頌德設計一個鑽飾藝術品，上面嘅鑽飾就係由周大福提供。Adrian人冇到，就派周大福董事總經理黃紹基同品牌總監陳義邦到場贈興。
呢件鑽飾藝術品喺展覽時先至有得睇，古珀行總裁沈運龍只透露，作品以「Coronet伊甸園」命名，用四百卡重鑽石鑲嵌喺兩公斤嘅金，估值約一千六百萬元。
至於點解搵雷頌德做設計？沈運龍就話，雷頌德除咗係音樂人，之前亦為BMW設計電單車，多才多藝，所以搵佢。