持續咗七十九日嘅佔領運動，令唔少市民覺得特區政府辦事不力，不單未能防患於未然，更加因為用催淚彈等引發更長期嘅佔領。之但係喺阿爺眼中，原來全部都唔係問題，噚日全國人大委員長張德江大讚梁班子完善處理佔中、堪稱國際典範。有政界中人話呀，估唔到因為不滿梁振英引發嘅佔領運動，竟然成為梁嘅政績，暗嘆泛民形同送咗張靚牌畀梁振英，二○一七年叫緊糊等冧莊。
張德江嘅發言，聽到唔少政界中人眼擎擎，嗰種高度讚揚嘅態度，絕對超乎咗大家嘅想像，尤其話梁振英平亂有功，得到內地甚至國際社會一致好評，誇張到梁振英好似要攞諾貝爾和平獎咁滯。
花生友向政界中人八卦過，有人話明明呢場運動，係因為佔中三子、雙學同泛民等接連判決錯誤失民心，最後自然死亡，一直採取拖字訣嘅梁班子，其實都唔係好需要點應對箒，偏偏阿爺歸功於梁振英兼大讚特讚，無非想發出「泛民越反對、阿爺越會撐佢」嘅訊息。
既然得到阿爺硬撐，二○一七年嘅特首選舉，梁振英似乎冧莊在望。有政界花生友話喎，觀乎張德江噚日嘅發言，如果冇普選，梁振英sure win；但若然過咗政改，則梁振英就算有得出閘，都未必一定跑出喎。據聞有政界中人喺張德江發表呢番言論後，即時好言相勸泛民中人，唔好再送多張靚牌畀梁振英嘞。