馬高列奧斯可以話係「黑蜂王」，連埋前晚喺德國盃第三圈俾對手撞傷膝頭而要喺比賽早段退下火線，自舊年六月到𠵱家已經第五次受傷（見附表），好彩今次傷得唔嚴重，應該唔使長唞；「蜜蜂兵團」多蒙特喺佢傷出後一樣夠贏，憑恩莫比尼梅開二度，作客贏丙組仔特雷斯登2:0，但利華古遜就累街坊，主場對乙組仔凱沙羅頓要戰至加時先至贏2:0晉級。
舊年六月頭，列奧斯喺世盃熱身賽自己扭傷左足踝，足足唞咗六十八日，結果連世盃決賽周都踢唔到。以為佢喺新球季轉運，點知仲係咁黑，上半季幫多蒙特同德國比賽時，左腳同右腳足踝輪流受傷，總共唞咗八十二日。踏入二○一五年，似乎冇再俾黑氣纏身，歇冬後上陣七場入五球，對上五場仲場場入波；誰不知喺禮拜二又傷過，左膝撞到特雷斯登中堅艾特文，唔可以繼續比賽，踢咗二十四分鐘就要由米希達利恩入替。
高路普以為列奧斯斷腳
列奧斯事後坐喺後備席上睇波，睇嚟傷勢唔嚴重，教練高路普賽後亦表示佢應該只係輕微撞傷，唞幾日就可以踢得番。高路普話：「我初時睇班球員嘅反應，以為列奧斯斷腳！好彩唔係咋，應該係撞傷，不過詳細情況要等佢之後做完檢查先知。」
今季列奧斯幫多蒙特踢咗十九場比賽，取得十一勝兩和六負，贏波率近六成，可見佢對蜜蜂兵團的確好重要。多蒙特雖則有馬高列奧斯傷出，但仍憑恩莫比尼入兩球贏2:0；恩莫比尼入嘅第二球仲要到九十分鐘先入，所以多蒙特呢個[-1]「客勝」開得好險。
利華加時先贏累街坊
多蒙特驚險贏盤，利華就連累捧場客損手。禮拜二佢哋雖然有射手孫興民停賽；不過賽前兩連勝，又有主場之利，大家都諗住佢哋食硬凱沙羅頓。點知佢哋做咗上盤客最憎見到嘅嘢，就係去到加時先贏；法定時間僅打和凱沙羅頓0:0，戰至加時一百零二同一百一十四分鐘分別由查漢奴古及傑斯寧建功贏2:0，真係衰到冇朋友！
識睇，一定係睇足英台【英波Live】：
http://soccer.appledaily.com
http://bit.ly/engballlive