二月二十七日星期五下晝，左丁山悠悠閒閒等出席「馨香宴」之際，忽然收到記者G急訊：「金管局要見記者，可能有新辣招」，跟住又傳來：「四點半記者會，如果有大件事要報導，或會影響出席馨香宴，千祈唔好呀！」講到咁，連左丁山都緊張埋，跟住見到股市下跌，地產股下滑，心諗一定係市場猜測金管局宣佈新辣招咯，乜唔係吖，如果金管局四點半開記者會係講未來基金，大可講到明吖，何必閉口不言記者會講乜？加上上午曾俊華見記者講過，如有新辣招，必會快而狠，股市中人個個挑通眼眉，梗係估陳德霖有辣招宣佈啦。
果然估中冇獎，陳總裁宣佈（一）將七百萬元以下樓宇嘅按揭成數上限由七成降至六成，（二）供樓款項佔入息比例五成降至四成，在利率壓力測試下，由六成降至四成；（三）非自用住宅、工商物業及單位，供款入息比率上限由五成降至四成，在利率壓力測試下，上限由六成降至五成。
自從2012年開始推出辣招之後，投資性物業買賣已大受打擊，炒家（根據地產代理講）幾乎銷聲匿迹，故此金管局新招之中，以第一招針對上車買家，換樓買家打得最痛。
星期六，肥仔K與一班中學同學團拜，呢班同學大學畢業後，已有人成為律師、建築師、工程師、教師、政府政務官等等，年紀剛好係30出頭，一講到買樓換樓，無不牙痛咁聲，大駡政府破壞佢地買樓好夢。其中一位係公務員，與太太加埋月入六萬幾七萬，每月供樓用二萬幾三萬嘅話，並無困難，困難係在於儲夠首期，公務員夫婦儲蓄七年，加埋父母肯俾一啲錢，本已有150萬元，可買500萬元樓盤，過年前興致勃勃走去睇樓，因為要過年，諗住放完假後先至搞，點知現在首期由150萬變成要200萬，公務員W為之㷫到彈起，買樓大計又要推遲，佢對肥仔K怒吼：「去邊度挖五十萬出嚟呀？等我倆儲夠200萬之時，可能層樓已經升多一成，咪又差20萬先至夠？而且本應我買入後賺到嘅升幅又冇埋，直情係雙重打擊，叫CY去瞓街啦！估唔到真用家，好多係80後，咁鬼唔高興。肥仔K問左丁山有乜感覺，唏，左丁山已經有樓，邊會激氣吖，辣招益咗啲有樓階級，等30零歲後生仔去嬲啦！