【尋找香港的首爾2】韓風席捲全球，韓星去到邊都被一大堆粉絲包圍，你想最近距離接觸偶像？不如努力學韓文，做偶像的貼身翻譯！
記者：鄒倩婷 攝影：馮嘉文、廖達燊
韓國華僑Wendy於90年代嫁來香港，努力學廣東話，在2001年開始為韓星做翻譯，可算是第一代最資深的韓星翻譯。自03年起，《大長今》、《浪漫滿屋》等韓劇大受歡迎，李英愛、Rain、裴勇俊等巨星頻頻來港搵銀，對翻譯的需求頓時大增，Wendy指工作從那時起便接踵而來，「慢慢我就係一個標誌，啲粉絲見到我就會話，『呢個阿嬸就係最近距離接觸我哋嘅偶像』，我覺得佢哋好似成日掘住我！」Wendy笑言好像做了粉絲的公敵，但同時亦做了韓星的朋友。她最喜歡大長今李英愛，至今仍然留着當年愛姐來港吃飯的餐單，上面有愛姐的簽名，「李英愛最鍾意就係食鮑魚，我覺得咁多藝人入面，李英愛最nice，佢嚟嘅人手都係最少，得四個人！」
不過Wendy也訴苦說，翻譯其實很辛苦，辛苦在於時間超長，有開工無收工。原來由接機開始，翻譯便要跟實韓星，不論他們出席活動、坐車、吃飯、遊玩，甚至去廁所，翻譯都要像保鑣般跟隨。她記得有次裴勇俊來港，還帶了健身師傅，晚上十時才做健身，「佢唔瞓我唔走得，咁就一齊去健身室，裴勇俊個人好nice，佢見我坐喺一邊就同我講：『你可以過嚟我身邊睇架喎』，不過嗰時我好眼瞓，我就心諗，『你健身咋嘛，我唔使睇架喎，我又唔係你嘅粉絲。』但係我要畀面佢，所以坐喺側邊睇，佢做完我仲拍手話：『好勁喎！』」
Wendy合作得最多的韓星是Rain，她指當時Rain的粉絲眾多，有次他在尖沙嘴吃飯，粉絲多到圍着餐廳，Rain根本無法離開，於是Wendy想到一個辦法，「因為我做翻譯，粉絲都認得我，我就帶住假Rain走，啲工作人員就帶真Rain行另一邊坐車走。」結果，翌日便有真假Rain的報道。
Wendy指現在越來越多人識韓文，很多後生女做翻譯，加上自己年紀越來越大，認為都是時候退下來，但她提醒後生一輩，一定要深入了解韓國文化，否則很容易闖禍。
《韓流小貼士》
Wendy指做翻譯時與韓星是工作關係，所以無論韓星的年紀比自己大還是小，都要說敬語才有禮貌。
《尋找香港的首爾2》
第一集：港男愛化韓妝 造型導師年賺過百萬
http://bit.ly/1Cnbfbf
第二集：90後做韓星夢碎 爆真人騷造馬黑幕
http://bit.ly/1M5vZWJ