【銅鑼灣崇光】啱啱開完演唱會嘅楊千嬅， 嚟緊又要忙宣傳佢同古天樂主演嘅《五個小孩的校長》，所以𠵱家梗係爭取時間陪吓囝囝Torres啦！前日下晝五點幾，千嬅就帶埋Torres，媽咪同埋外傭姐姐，一行四人去咗銅鑼灣崇光百貨七樓家居精品擺設部shopping，最初千嬅睇得好開心，不過話晒銅鑼灣係自由行必去嘅地方，所以當呢班旅客見到千嬅嗰陣，梗係即刻拎部手機出嚟捕獲喇！
Torres好奇四圍望
素顏、戴黑超兼便服look嘅千嬅，見到呢班熱情如火嘅旅客，最初都好樂意同佢哋影合照，點知影完幾個人嘅合照之後，轉頭又話影單人合照，千嬅影完單人諗住走喇，喺另一邊又有另一班人馬殺出嚟，又再重複要求影合照，本來有fans搵影相係一件開心嘅事，但係睇到囝囝同媽咪企喺側邊，囝囝莫名其妙咁望實自己，結果千嬅個樣勁無奈，最後都忍唔住婉拒。
成功逃出生天嘅千嬅，一行四人繼續行，不過唔知係咪掃興，所以只係行咗一陣就搭𨋢走人，臨走嗰陣經過買銀器嘅地方，Torres指住啲匙羹，聽到千嬅話：「成萬蚊㗎！呢啲唔係玩具！」喺佢哋等𨋢嗰陣，千嬅抱住囝囝見到有記者影相，佢都冇避開鏡頭，反而外傭姐姐即刻走近千嬅身邊，實行做人肉屏風遮住小主人，但係Torres好好奇咁周圍望，臨入𨋢嗰陣聽到千嬅同記者講bye bye，佢都好乖咁跟住講埋一份！
噚日千嬅又再出動，今次加多女友人，一行五人去咗中環置地嘆茶，着住恐龍衫嘅Torres跳跳紮冇時停，不過見到越嚟越多記者影相，最後千嬅call咗司機先帶囝囝離開，之後再返去會合媽咪，繼續嘆茶同shopping。
採訪、攝影：徐錦池、羅德光
