美國聯儲局主席耶倫能醫不自醫，佢為美國理財，掌控美國、甚至全球嘅經濟，自己嘅資產竟然縮水！
美國政府文件披露，耶倫同佢老公、諾貝爾經濟學獎得主阿克洛夫，兩人舊年資產總值四百九十萬至一千三百四十萬美元，計番港紙約三千八百萬至一億元，較前年嘅五百三十萬至一千四百一十萬美元稍為減少。
睇番條數，呢對經濟學夫婦大部份係投資喺加州大學的退休計劃，另外有二十萬至五十萬美元放喺兩個聯名戶口，都算穩陣投資。
不過原來佢哋持有ConocoPhillips同Phillips 66兩間油企嘅股份，舊年年中油價急挫，油企股價跟住跌，兩間公司股價由年中至年底分別跌13.6%及15.4%，令儲局貴婦耶倫身家唔見咁啲。不過耶倫之前話，油價下跌對美國經濟影響只係暫時性喎。