中國人農曆新年會去行大運，嚟自英國嘅港大校長馬斐森都入鄉隨俗，噚日佢喺港大新春團拜透露，農曆新年趁有幾日假租車同太太及愛犬Darcy遊車河行大運，去石澳、龍脊同粉嶺郊遊，仲去埋大埔林村許願樹學人拋寶牒。唔知係咪怕好似有線新聞小花曉瑩BB咁，唔小心掟中人哋個頭，馬斐森話佢揀咗較矮嘅樹枝嚟拋，一take成功。
八方問佢喺寶牒寫咗乜願望？佢話唔講得，怕講咗唔靈，只係話個願望同家庭有關。其實好難怪八方諗多咗嘅，上年未正式上任就俾人質疑，到做咗校長又有佔中，其後又有干預港大遴選副校長風波，如果八方係佢，梗係最想捍衞學術自由兼夾港大揚威全球，佢噚日致辭時就話，舊年發生好多事，希望今年專注大學發展。
至於有冇後悔嚟港做校長？佢話原來同媽咪用skype傾偈時都有講呢個話題，好肯定無悔，亦好珍惜呢個機會。
即席揮毛筆寫「羊」字
噚日係馬斐森做校長以來首個港大春茗，佢即席用毛筆寫「羊」字揮春，仲蓋上校方為佢預備、刻咗佢個中文名嘅玉璽，但原來佢只係前一日用咗一個鐘學揸毛筆。佢又帶領一班唔同國籍嘅院長同教職員，用廣東話祝大家喜氣洋洋，講到甩甩咳咳，佢哋自己都忍唔住笑。
李八方
mailto:[email protected]
