媾女王吳浩康（Deep）被爆一個月內連𠝹六女，還當街啜爆34E巨乳𡃁模Yvette Chow，形象破產的他雖獲女友鍾舒漫（Sherman）原諒，卻一直潛水避見人。據知，龜縮Deep將於後日現身慈善籃球賽，另消息指熱愛運動的他近年冧掂足球隊的話事人，讓他為這支甲組球隊搞宣傳，有水喉射住難怪多女埋身。
Yvette突變巨咪
月前Deep被本報影到翻撻舊愛𡃁模Olivia，原來當日就是帶她去香港大球場睇東方足球隊與傑志比賽，昨Olivia在電話說：「佢話隊波有份搞，叫我去支持吓，嗰日球隊仲贏波。」對於Deep被爆早年財困問舊愛借錢，問Deep曾否向她借錢？Olivia說：「梗係冇，我唔會問佢有冇錢，平時食飯飲嘢都係佢埋單。」近日有否跟Deep聯絡？她說：「之前有問佢點？佢話係誤會嚟，同Yvette冇嘢喎。」
至於巨乳Yvette亦被大起底，寂寂無聞的她曾行性感騷，之前胸部平平，近年疑僭建變34E巨咪，愛蒲夜店的她有客串捽碟，閒來愛做瑜伽並考獲瑜伽導師，有雜誌爆Yvette本來是屋村妹，財來自有方的她現住鑽石山寓所，不但有車有樓揸手，還跟內地武指、猛料男友和Deep過從甚密疑一腳踏三船，有指Yvette跟Deep暗交四年並長期倒貼助他度過經濟難關。
Hazel即撇關係
據知，星運平平的Deep自早年藏毒罪成後收入大受影響，有指他曾問舊愛莊思敏和𡃁模唐紫睿（Hazel）借錢，昨日本報向Hazel求證，她以短訊回覆：「冇回應喇，唔想再同呢個人扯上關係，以後揀男友會小心。」
採訪：皓騫、陳杰