央視前記者柴靜所拍霧霾紀錄片《穹頂之下》，前幾日紅爆網絡，連帶環保股連日大升。中宣部見勢色不對，連忙下令封殺所有相關報道，而家連柴靜都人間蒸發埋，環保股結果今日要回吐。內地股民於是轉去炒另一央視前記者概念，A股噚日有五隻基因測序股升停板，輪到鼓吹反對轉基因食物的崔永元呢期發圍。
崔永元同柴靜情況好相似，都曾經係央視當紅記者，然後劈炮唔撈，自己出錢去拍敏感議題紀錄片，再擺上網。佢舊年拍咗條紀錄片，講內地轉基因食物氾濫，毒害好大，震撼全國。不過，崔永元係全國政協委員，當局好難禁聲，佢噚日繼續炮轟食物安全，所以呢個板塊仲有排炒。
所謂轉基因食物，是指生產商改變食物基因以提高產量，有好大毒性。傳統方法難以驗出，要靠一種叫基因測序的技術。而家A股有好多醫藥公司聲稱有呢種技術，股民亦難辨真假，總之炒咗先算。
老實講，內地空氣、食物、水、土壤，樣樣都有好大毒性。當局唔畀講，但有關訊息一旦流咗出來，呢種恐慌性購買可以令到阿貓阿狗的相關股，都會大升。內地股民炒完柴靜效應，再炒崔永元效應，其實並非失去理性。
李可強