金魚缸騎呢股份何奇多，但近年最不可思議的，海迪認為非漢能薄膜發電（566）莫屬。不少芬佬都說，身邊無認識任何一個人，夠膽大手買入呢隻股票。皆因漢能差不多有八、九成生意，都是來自和母公司的關連交易，當中仲有唔少銷售係未找數，被列作應收賬處理。
雖然市場對漢能所繪畫的rosy picture並不受落，無分析員敢畀rating，無大戶肯落叠。但奇就奇在，呢隻股份近年依然不斷喪升，半年間升咗400%，市值已大過港交所（388）。究竟咩人咁有財力掃貨？而既然漢能咁多疑團，PE去到八十倍咁高，照計應該吸引好多如渾水、Glaucus等沽空機構出手狙擊㗎？
不過市場口痕友就話，漢能係「勁」到你唔會夠膽short的。據路邊社消息，舊年就有人特登喺市場放風，兩、三蚊借貨畀人short，最後真的有大fund落叠，結果？就係港股通每日都有人來買貨，夾爆晒囉。所以朋友話，貨喺人哋度，錢佢哋又大把，點夠人玩呢？
漢能大股東李河君，最值錢的生意其實是水力發電，每年cashflow達七、八十億人仔。不過，《金融時報》早前就揭發，漢能母公司已用部份水電資產做抵押品，來向信託公司借錢搞太陽能。
到底漢能會唔會係蒙能（276）翻版？有待時間證明。
海迪