民政事務局政治助理徐英偉已經辭職，盛傳佢準備「返娘家」民建聯出任總幹事一職，係本屆政府第四個「跳船」嘅政助。八方聽聞，該局早排已經密密搵人，見過政黨中人，亦有人建議民建聯青年黨員「世襲」政助職務。
近日政界就傳出，民政事務局局長曾德成唔想搵政黨中人，改為向本身是大律師嘅青年事務委員會委員范凱傑主意，想搵佢接手做政助，范同時係去年香港青年服務大獎嘅得主。不過，八方噚日搵佢求證，佢斬釘截鐵話：「冇啲咁嘅事。」其實徐英偉個位雖然只係政助，但民政手握唔少地區資源審批權，有利廣建人脈，對想從政嘅建制派年輕人嚟講，絕對係一個鋪路嘅肥缺，多人爭係自然嘅。