1.買合約子虛烏有
有報道特首畀錢買番梁小姐嘅合約。我代表電影公司作出嚴正聲明，我哋從來冇收到過梁齊昕小姐嘅任何正式通知，另外，甚麼特首買番合約嘅事亦完全子虛烏有，特首從來冇嚟聯絡過我哋，公司到𠵱家冇收過任何一毫子。
2.揀角色不論背景
據梁小姐講佢父母反對佢拍，原因係因為作為導演嘅我，曾經執導過三級片好cheap，仲有梁小姐嘅專訪提及，父母唔鍾意陳惠敏，喺戲中扮演梁小姐嘅爸爸，或者係因惠敏哥深入民心嘅江湖人物嘅形象有關啩。如果考慮演員背景，我哋就唔會簽梁齊昕小姐做女主角。
3.電影停工三星期
就係梁齊昕小姐雖然唔參與電影方面籌備會議，但佢又會出席我哋電影男主角李逸朗嘅音樂會，音樂會後更要求逸朗相約時間排戲，直至當時，我哋都仲未明白梁齊昕小姐發生乜嘢問題？全體劇組演員加埋有幾十人，劇組、演員、機器早就book晒期落晒定，我哋電影公司亦損失達七位數字嘅金額，包括男主角李逸朗、EO2光頭仔、樓南光、陳惠敏等幾位，都係大忙人都檔期緊密，𠵱家因梁小姐嘅問題，電影運作停頓三星期。
4.叫齊昕秋生絕交
梁齊昕專訪講到，黃秋生係佢好好朋友，我都聽過齊昕講過，特首又知唔知道，黃秋生攞影帝，就係拍三級片，劇中佢仲用筷子插女人下體，咁咪好cheap？佢仲拍過《伊波拉病毒》呢套戲，又姦屍又用嚿肥豬肉嚟發洩性慾，咁又好cheap啦，如果照梁齊昕引述特首講法，執導過三級片好cheap唔可以請佢拍戲，咁佢咪要梁齊昕同黃秋生絕交？