商場搞活動通常搵來藝人或者靚女model，吸引人望多兩眼，新地（016）旗下觀塘apm商場，就趁元宵佳節在即，舉行「古董定情信物嫁妝珍藏展」，展出一批由戰國、漢代、清代至清末民初嘅定情信物同嫁妝珍品，並由一位靚女model做示範。新地代理租務總經理馮秀炎似乎唔想被model搶晒鏡，噚日都悉心打扮兼且行頭十足咁現身喎。
馮秀炎一身貴婦look華麗登場，除咗着到紅噹噹、成封利是咁應晒節之外，身上嘅珠寶首飾亦唔講得笑。佢呢一身頸鏈、戒指、手鏈夾埋總值幾十萬元。馮秀炎話，呢批首飾全部係喺旗下上海國金中心商場嘅租戶度買，入面有好多商戶都係由佢喺香港帶去上海，所以趁新年幫襯番佢哋咁話。