金天醫藥（2211）已經有盈喜打底，預測PE得單位數兼係低嗰隻，平過行家一大截。嚟緊日子特別係食住東北地區醫療需求，加埋電貿，金天keep住肥仔水。
泊到阿里大碼頭
金天醫藥主打祖國東北地區醫藥零售同分銷業，兼且係當地龍頭性企業。而喺早排嗰陣，就連阿里巴巴旗下嘅阿里健康（241），就同金天醫藥組成戰略合作，做阿里健康喺東北電子平台連鎖藥店合作方，可通過平台銷售處方藥品，金天架勢堂級數。
再睇祖國同東北地區情況，阿爺藥監局旗下南方醫藥經濟研究所預計，今年祖國醫藥銷售規模，會上到2.3萬億元人仔，而東北地區醫藥市場規模，會去到一千五百四十億元人仔，比二○一二年增加兩倍。喺地區城市快速發展，再加埋醫保支持，令到醫療需求大增，金天醫藥又係當地大哥大，食住大勢，已經長做長有。
場內專業評估，金天醫藥就快派二○一四年成績單，EPS去到0.36港銀，預測PE得7.4倍。又食住地區需求，係咁意估金天醫藥今年EPS增長兩成咁大把，去到0.43港銀，預測PE再跌到得6.2倍。
又場內有份同上邊醫藥電貿大哥阿里健康合作嘅，有白雲山（874），專業評估，白雲山就快派嘅二○一四年度成績單，預測PE有調降，但係講緊二十二倍。而場內主打醫藥零售同分銷嘅，國藥（1099）、上海醫藥（2607）同埋同仁堂（8138），全部預測PE係雙位數。金天大平賣。
券商大孖沙大摩，早輪將金天目標價定喺4.5元，金天現價（2.69元）要升66%！咪咁貪心，金天試番去上年第四季橫行頂3.5元水位，都講緊要升三成。到時，集團今年PE，先得嗰八倍，未有耐上到雙位數兼追到行家。
錢雋
細價股專家
本欄逢周二、三、五刊出