正所謂人生何處不相逢，加尼特（Kevin Garnett）愛回家重返木狼，周一NBA常規賽領軍鬥快艇，就見番昔日喺塞爾特人合作嘅教練李華士（Doc Rivers），兩人賽前好老友，攬攬先開波；KG第四節仲幫李華士教仔，同A李華士（Austin Rivers）起衝突，雙雙食技犯。
被撞即喪鬧A李華士
加尼特○七年為咗冠軍指環，決定離開效力十二年嘅木狼，轉投由李華士執教嘅塞爾特人，仲順利贏到○八年總冠軍。時至今日，綠軍三巨頭同教練已經各散東西，李華士教緊西岸勁旅快艇，周一作客木狼，就同做番「狼王」嘅KG聚頭。李華士賽前亦大讚：「KG係年輕球員嘅好典範，木狼𠵱家擁有好多優秀新星，佢哋正需要KG分享經驗。」
不過，三十八歲嘅KG繼續好火氣。佢喺第四節一次緊迫防守搞到快艇後衞基斯保羅（Chris Paul）好狼狽咁叫暫停，梗係好興奮啦；「世姪」A李華士好衰唔衰行返後備席時撞到KG，KG當堂指住佢嚟鬧。話晒KG開始打NBA嗰陣，A李華士只係個三歲細路咋，見到「Uncle」咁好火，佢當然聲都唔敢聲，最無辜係仲要同KG齊齊食技犯。可惜木狼喺KG振士氣下，仍然以105:110飲恨。
周一其他比賽都火氣十足，好似熱火主場對太陽，主隊中鋒韋西迪（Hassan Whiteside）喺第三節補樽後，隻右手手踭順便同客隊中鋒蘭恩（Alex Len）「開年」，兩位七呎巨人扭埋一嚿玩摔角，球證最後各送一個二級暴力犯規趕晒佢哋出場。而東岸第三位嘅公牛再傷一件，繼戴歷路斯（Derrick Rose）要唞四至六周，輪到射手占美畢拿（Jimmy Butler）左手手踭受傷，又要唞三至六星期。
識睇，一定係睇足英台【英波Live】：
http://soccer.appledaily.com
http://bit.ly/engballlive