賭馬有一段日子嘅馬迷，都知道喺香港，好多馬根本未贏過就退役，其實都冇話特別可惜，冇實力而贏唔到，係好自然嘅事。但有啲馬明明長期保持戰鬥力，質素亦唔太差，但搏來搏去經常跑第二唔開齋，呢啲先至係真正嘅黑仔馬。
好似今期(4日)第三場五班1650米，就有一對呢類馬，七歲嘅「晨采」曾取六亞三季而未勝，而六歲嘅「宇宙駿駒」更跑過七次第二唔出頭，其中「宇宙駿駒」跌到20分，已喺淘汰線以下，下季分分鐘冇得玩。今次一對黑仔王大對決，邊隻可以贏番場，抑或雙雙繼續輸呢？
以排位計，兩隻馬都排外檔表面好曳，但「晨采」始終強配雷神，佢嘅騎功及走位有幾叻，已毋須多講，而「晨采」近況亦唔曳，上仗衝入一席季軍，跑第二嘅「金瀛」再出繼續入Q，話晒「晨采」過去三班亦多次上名，家陣喺五班總有分量，即管睇吓雷神可唔可以帶領呢二奶馬，脫離黑仔行列！