周一晚，英超同西甲都冇直播，但意甲就有場羅馬迎戰祖雲達斯嘅榜首大戰。羅馬如果今仗贏唔到祖記，基本上爭冠已經冇乜希望，皆因佢哋落後九分咁多，所以我求大俠以為場波會好刺激，特登捱夜睇，但點知兩隊上半場都好似唔想贏咁，夾埋射門得兩至三腳，悶到我差啲瞓着。
直到六十二分鐘，羅馬嘅右閘托路斯迪斯領紅牌被逐，場波先似係正式展開，皆因祖記就靠呢個罰球機會，由泰維斯妙射建功，之後以為打多一個，加上整體演出稍為好少少，可以保住勝局；但點知羅馬好似突然醒番晒咁，結果七十八分鐘，施度基達嘅頭槌攻門，頂中回防嘅馬治斯奧隻腳入網，追成1:1完場。祖記教頭艾基利賽後嬲爆球隊打多一個，都被追和，但我就覺得佢可以定啲，因為羅馬踢完呢場都繼續落後九分，以佢哋下半季成日失魂嘅演出，你慌佢哋仲有得追？
識睇，一定係睇足英台【英波Live】：
http://soccer.appledaily.com
http://bit.ly/engballlive