新一輪日劇收視戰下個月就會展開，神劇《半澤直樹》男星堺雅人主演嘅NTV新劇《Dr.倫太郎》，同木村拓哉孖上戶彩合拍嘅朝日劇《I'm Home》都會喺呢個春季檔期上映。
堺雅人喺《Dr.倫太郎》飾演一名天才精神科醫生，專為高官治療心理障礙，佢嘅造型照已經公開，而女角人選亦剛公佈會由蒼井優同《晝顏》嘅吉瀨美智子演出。蒼井優演一個讓堺雅人為之瘋狂嘅新橋藝妓，吉瀨則係同堺雅人青梅竹馬嘅靚女外科醫生，劇組仲爆堺雅人同吉瀨會有床戲，而內田有紀、酒井若菜同長塚圭史等都有份演出。
劇集陣容強勁，據聞一般劇集製作費一集最多係二百萬港元左右，今次就去到成五百二十萬港元，呢場收視戰的確許勝不許敗。至於蒼井優前日就喺東京，出席佢二○○六年電影《草裙娃娃呼啦啦》取景地福島縣嘅一個復興觀光宣傳活動。
撰文：艾美美