特首梁振英競選時講明「丁屋政策的問題要想方法解決」，但上任至今一直冇提任何政策，思匯噚日舉辦傳媒茶敍，行政總監葉溵溵透露，上半年公佈幾份報告，包括一份關於丁屋政策嘅民調，佢都好坦白講香港「冇人好敢掂呢樣嘢」，八方問算唔算向政府「追數」先？佢就話呢份民調只係反映民情，畀個方向政府入手喎。
民調罕有咁訪問咗六百位原居民意見，葉話接觸過程「難到不得了」，加上調查適逢佔中，幫手嘅大學生跑晒去佔中，進度都慢咗。思匯過去多次做丁屋議題，前行政總監、現任環境局副局長陸恭蕙成立思匯前，因為爭取女性丁權，同鄉紳反晒面，但葉溵溵話冇有怕，有討論係好事。