人民力量「大嚿」陳偉業噚日「登六」，繼早前喺加拿大獲愛女送上蛋糕慶祝佢六十歲生日後，噚日又獲自由黨田少，帶埋黨友方剛同鍾國斌陪佢食晏慶祝，田少更請佢飲麒麟啤，𠱁得大嚿鬼咁開心。而一班人力領導包括主席袁彌明、快慢必等，噚日就喺人力記者會後，突然向大嚿送上蛋糕慶祝，大嚿則以嗌口號方式許願，指今年有三個願望，包括「我要真普選」、「揼實轉軚小人」同「打倒六八九」，透露除咗自由黨，其實不少政界朋友，平日都有請佢食飯聯誼，「係梁振英請我哋至唔去箒，司局長請我都會去」，至於噚日生日正日，就一定返屋企陪老婆過喎。