起來，不願做貓奴的人們！唔想再受貓主人嘅煎熬？請佢哋食無情雞啦！傳統習俗，老闆想炒個伙記會請佢食無情雞，食飯時將碟雞嘅雞頭對住佢。貓奴們可以請貓主人食「雞頭貓罐頭」！
有貓奴喺fb上載一張相，見到打開咗嘅貓罐頭入面除咗有雞肉絲，仲有一整個雞頭，雞眼雖已閉合，去得安詳，但唔少貓奴見到都嚇咗一跳。
#魚肉口味有魚頭
費清同事阿和係典型貓奴，買咗幾罐畀貓主人嚐鮮。佢話喺銅鑼灣嘅貓店買到，一罐約二十蚊，有名堂叫「杞子燉雞」，罐上面仲註明有百分之三十三成份係雞頭，杞子有百分之一點五。嘩，好補喎。貓奴和話佢隻貓藍波有食開呢隻牌子，「都唔知原來有呢款口味，正呀」。
呢隻牌子都有魚肉，都係成隻魚頭㗎。網民都話其實只係人類睇唔慣，例如Kiwi Leung就話佢啲貓勁鍾意食雞頭罐頭。
費清用筷子篤過個雞頭，骨頭都煮到軟，而且聞落去有啲忍唔住吞咗啖口水。我叫貓奴和放心，唔會同佢隻貓爭，但佢話自己已搶先試味，「好清淡」。佢嘅舉動令我諗起皇帝食飯前，都會有奴才試過味以防皇上中毒，貓奴果然盡忠職守，之不過試味嘅好多時都係太監……
費清 ＃要生計，也要生活 ＃毋忘初衷