長實（001）「樓神」趙國雄除咗掛住幫超人諗計賣樓之外，原來亦十分關注母校浸會大學嘅發展，多年來，個人捐款畀浸大嘅款項超過一百五十萬元。浸大噚日公佈第二屆「傑出校友獎」嘅得獎名單，當中就包括趙國雄。
趙國雄平時現身，多數只係講賣樓或者樓市前景，好少講私事，亦唔會將母校掛喺嘴邊。查實佢喺一九七一至七三年就讀浸大前身，即係浸會學院社會學系，後來喺一九七八年再去加拿大特倫特大學取得社會及經濟學文學士。佢二○○九年開始擔任浸大基金董事局成員，個人都捐過百萬元支持浸大發展同校園擴建。
睇番長實年報，趙國雄二○一三年嘅年薪接近二千九百萬元，捐款過百萬元，對於趙樓神嚟講，認真濕濕碎喇，更何況家陣樓價係咁升，一百萬都未必畀到上車盤嘅首期㖭呀！