呢期最hit係乜嘢？當然係野生捕獲「發哥」周潤發玩selfie啦！其實除咗發哥外，仲有其他人都成為市民野生捕獲目標，其中一個就係警隊「一哥」曾偉雄。仲有兩個月就退休嘅曾Sir噚日喺新春酒會同八方暢談退休大計時，同發哥一樣喜歡行山嘅佢，話行山時冇遇過發哥，但就經常有山友要求合照，拍得野生捕獲一哥照片留念。
八方噚日都提議同曾Sir玩selfie，好似財爺鬍鬚曾咁，可惜曾Sir婉拒，至於退休大計，曾Sir話退休後有好多嘢要做，首要唔係計劃同老婆遊埠，而係執屋同執辦公室，佢話希望退休後做義工。至於退休後會否做政協，曾Sir話前任「一哥」鄧竟成做政協做得好好，唔輪到佢做。不過國家需要你嘅時候，八方相信曾Sir唔會托手踭。